S'economia e is abis

S'economia e is abis

Sa masserìtzia in Santu Sparau est de importu mannu finsas de s’antigòriu, ca dda favoressit una terra grassa e prena de àcua. Sa bidda ddi donat importu sèmpiri de prus e oindi’ puru est su fundòriu de s’economia sua.

Santu Sperau difatis est unu de is prus tzentrus mannus de sa masserìtzia in Sardìnnia, prus chi totu po su chi spetat sa fruta.Su sartu ddu trabàllant meda e a is abisitadoris parit unu frageri mannu, cun giualis de prèssiu e agrumis. Su prèssiu est su meri mannu de su sartu e, in is ùrtimus binti annus, Santu Sperau est bessiu su prus produsidori mannu de prèssiu de totu Sardìnnia.

Acanta de su prèssiu ddoi funt is agrumus e prus pagu meda piricocu, trigu, tomata, lori e birdura. De pagora, ma andendi a innantis, funt arendi mura de terra.Andendi a innantis meda funt is froris postus in is domus de imbidri e, impari a custu traballu at caminau finsas su de is abis.

Is abis

Ddoi at duas siendas mannas chi traballant cun is abis in su sartu de Santu Sperau e si nd’est aciunta un’àtera de pagora, prus pitichedda. Custu campu est amanniendi e si pensaus chi at a andai a innantis sèmpiri de prus, ca sa genti bolit sèmpiri de prus cosa bona e sana. Su traballu de torrai a pesai is padentis in su sartu at a fai andai a innantis custu traballu chi in Sardìnnia est antigu meda.

Difatis Ciceroni, su studiau latinu famau, chistionat de su meli marigosu fatu in Sardìnnia, chi oindi’ puru dd’aprètziant unu de is mellus. Ddu produsint in su sartu de Santu Sparau, ponendi acanta de s’olioni is casiddus e aici ddi donant unu sabori amarigoseddu.

In Santu Sperau is abis faint meli aromatisau de medas calidadis. Po donai aromas fortis imperant is matas de agrumus, chi faint meli aromatisau a sabori de fruta durci, e is eucalitus chi faint meli balsàmigu famau cun d-unu gustu salideddu.